Гіпакоі і Ўзыходныя песьні
У нядзелі людзі сьпяваюць гіпакоі і ўзыходныя песьні адпаведнага тону. У вялікія сьвяты сьпяваюцца сядальныя песьні сьвята і наступныя ўзыходныя:
(Тон 4). Безьліч грэшных жаданьняў мучыць мяне з раньніх дзён, але Ты, Збавіцелю мой, заступіся і збаў мяне.
Госпад пасароміць вас, ненавісьнікі Сыёну: ссохнеце ўсе марна, як трава ад агню.
Слава Айцу, і Сыну, і Сьвятому Духу, цяпер і заўсёды, і на вякі вякоў. Амін.
Сьвятым Духам усякая душа ажыўляецца, узвышаецца чысьцінёю і прасьвятляецца тайна Трыадзіным Боствам.
Пракімен і Евангельле
Дыякан: Будзьма ўважлівыя. Мудрасьць, слухайма ўважліва.
Чытальнік чытае пракімен нядзельны або сьвята.
Дыякан: Госпаду памолімся.
Людзі: Госпадзе, зьмілуйся.
Сьвятар: Бо Ты сьвяты, Божа наш, і сярод сьвятых спачываеш, і мы Табе славу аддаем, Айцу, і Сыну, і Сьвятому Духу, цяпер і заўсёды, і на вякі вякоў.
Людзі: Амін.
Дыякан: Усё, што жыве, хай хваліць Госпада.
Людзі: Усё, што жыве, хай хваліць Госпада.
Дыякан: Хваліце Госпада ў сьвятых Яго, хваліце Яго ў велічы сілы Яго.
Людзі: Усё, што жыве, хай хваліць Госпада.
Дыякан: Усё, што жыве.
Людзі: Хай хваліць Госпада.
Дыякан: І каб нам быць дастойнымі слухаць сьвятое Евангельле, Госпада Бога молім.
Людзі: Госпадзе, зьмілуйся; Госпадзе, зьмілуйся; Госпадзе, зьмілуйся.
Дыякан: Мудрасьць, устаньце. Будзем слухаць сьвятое Евангельле.
Сьвятар: Мір усім.
Людзі: І твайму духу.
Сьвятар: Чытаньне сьвятога Евангельля паводле … (імя евангеліста)
Людзі: Слава Табе, Госпадзе, слава Табе.
Дыякан: Слухайма ўважліва.
Сьвятар чытае Евангельле. Калі скончыць, кладзе Евангельле на аналоі сярод царквы і ідзе ў алтар.
Людзі: Слава Табе, Госпадзе, слава Табе.
У нядзелі і на сьвята Ўзвышэньня Крыжа сьпяваюць:
Убачыўшы ўваскрасеньне Хрыстова, паклонімся сьвятому Госпаду Ісусу, адзінаму бязгрэшнаму. Крыжу Твайму пакланяемся, Хрысьце, і сьвятое ўваскрасеньне Тваё ў песьнях славім. Ты – Бог наш, апроч Цябе іншага бога ня знаем, імя Тваё клічам. Прыйдзіце, усе верныя, паклонімся сьвятому ўваскрасеньню Хрыстоваму, бо праз Крыж прыйшла радасьць усяму сьвету. Заўжды бласлаўляючы Госпада, славім Ягонае ўваскрасеньне, бо Ён, пацярпеўшы ўкрыжаваньне, сьмерцю сьмерць зваяваў.
Псалом 50
Чытальнік: Зьмілуйся нада мною, Божа...
Людзі сьпяваюць сьвяточныя вершы:
У нядзелю:
Слава Айцу, і Сыну, і Сьвятому Духу.
Малітвамі апосталаў, Міласэрны, ачысьці мноства правінаў нашых.
Цяпер і заўсёды, і на вякі вякоў. Амін.
Малітвамі Багародзіцы, Міласэрны, ачысьці мноства правінаў нашых.
Зьмілуйся нада мною, Божа, паводле Тваёй вялікай міласэрнасьці і паводле мноства дабротаў Тваіх ачысьці беззаконьне маё.
Уваскрос Ісус з магілы, як прадказаў, даючы нам жыцьцё вечнае і веліч зьмілаваньня.
Ад нядзелі мытніка і фарысэя да пятай нядзелі Вялікага Посту сьпяваюцца наступныя песьні:
(Тон 8). Слава Айцу, і Сыну, і Сьвятому Духу.
Пакаяньня дзьверы адчыні мне, Жыцьцядаўча: дух мой імкнецца да сьвятыні Тваёй; сьвятыня ж цела майго ўся апаганеная, але Ты, Добры, ачысьці мяне ў вялікай міласэрнасьці Тваёй.
Цяпер і заўсёды, і на вякі вякоў. Амін.
На збаўленьня шлях настаў мяне, Багародзіца; я апаганіў душу маю саромнымі грахамі і ў ленасьці ўсё жыцьцё маё змарнаваў; але Тваімі малітвамі выбаў мяне ад усякай нечыстаты.
Зьмілуйся нада мною, Божа, паводле Тваёй вялікай міласэрнасьці і паводле мноства дабротаў Тваіх ачысьці беззаконьне маё.
Раздумваючы над мноствам зробленых мною лютых грахоў, я, няшчасны, з трапятаньнем чакаю страшнага дня суднага: але, спадзеючыся на веліч добрасардэчнасьці Тваёй, як Давід клічу: “Зьмілуйся нада мною, Божа, у вялікай міласэрнасьці Тваёй.”
Дыякан: Збаў, Божа, людзей Тваіх і блаславі набытак Твой, наведай сьвет Твой міласэрнасьцю і дабротамі Тваімі, узьнясі рог хрысьціянаў і зышлі на нас Твае багатыя ласкі малітвамі найчыстае Ўладаркі нашае Багародзіцы і Заўсёды Дзевы Марыі; сілаю пачэснага і жыватворчага Крыжа; заступніцтвам сьвятых нябесных сілаў анёльскіх; малітвамі сьвятога, слаўнага прарока, Прадвесьніка і Хрысьціцеля Яна; сьвятых, слаўных і годных пахвалы апосталаў Пятра і Паўла і ўсіх сьвятых апосталаў; між сьвятымі айцоў нашых, сусьветных вялікіх настаўнікаў і сьвятаначальнікаў Базыля Вялікага, Рыгора Багаслова і Яна Залатавуснага; між сьвятымі айца нашага Міколы цудатворцы, арцыбіскупа Мірлікійскага; сьвятых, слаўных і роўных апосталам настаўнікаў славянскіх Кірылы і Мятода; між сьвятымі айца нашага Кірылы, біскупа Тураўскага; сьвятое маці нашае Еўфрасіньні Полацкае, асьветніцы Беларусі і ўсіх сьвятых заступнікаў беларускага народу; сьвятога (сьвятой) … (імя сьвятога дня); сьвятых і праведных богаайцоў Якіма і Ганны і ўсіх сьвятых: просім Цябе, міласэрны Госпадзе, выслухай нас, грэшных, якія молімся Табе, і зьмілуйся над намі.
Людзі: Госпадзе, зьмілуйся. (12 разоў)
Сьвятар: Міласэрнасьцю, дабротамі і чалавекалюбствам адзінароднага Сына Твайго, з якім блаславёны Ты і Твой усесьвяты, добры і жыватворчы Дух, цяпер і заўсёды, і на вякі вякоў.
Людзі: Амін.
|
Галерэя
