01 - 02 - 03 - 04

3.

Новае жыцьцё ў Хрысьце

Хрыстос - прынцып новага жыцьця

1. Дык калі вы ўваскрэсьлі з Хрыстом, шукайце таго, што ўгары ёсьць, дзе Хрыстос сядзіць праваруч Бога,

2. пра ўзгорнае думайце, а не пра зямное.

3. Бо вы - памёршыя, і жыцьцё ваша пахаванае з Хрыстом у Богу!

4. Калі аб'явіцца Хрыстос, жыцьцё вашае, тады і вы аб'явіцеся з Ім у хвале.

5. Дык мярцьвіце тады члены вашыя, што на зямлі: распусту, нячыстасьць, любежнасьць, юр, ліхія пажаданьні і сквапнасьць, якая ёсьць ідалапаклонства,

6. праз якія надыходзіць гнеў Божы на дзяцей недаверства,

7. сярод якіх і вы калісьці хадзілі, калі былі між імі.

8. Але цяпер адкіньце ўсё гэта: гнеў, мсьцівасьць, злосьць, блюзьнерствы і брыдкія словы з вуснаў вашых.

9. Не хлусіце адзін аднаму, скінуўшы з сябе старога чалавека з яго ўчынкамі

10. і прыадзеўшыся ў новага, які ўсьцяж аднаўляецца ў пазнаньні па ўзору Таго, які яго стварыў,

11. дзе ўжо няма Грэка і Юдэя абразанага ці неабразанага, барбара, Скіта, вольнага і нявольніка, але ўсё і ва ўсім Хрыстос.

12. Дык адзеньцеся як выбраньнікі Божыя, сьвятыя і ўмілаваныя, у сэрца спагаднае, ласкавасьць,  пакорлівасьць, сьціпласьць, цярплівасьць,

13. церпячы адны адных і прабачаючы адны адным, калі хто да каго мае жаль; як і Госпад дараваў вам, так і вы.

14. А па-над усё мейце любоў, якая ёсьць вузлом дасканаласьці.

15. А супакой Хрыстовы, да якога вы і пакліканыя ў адным целе, хай пануе ў сэрцах вашых. І будзьце ўдзячныя.

16. Хай шчодра прабывае ў вас Слова Божае, каб з усёю мудрасьцю адны адных навучалі і напаміналі ды каб у ласцы ў сэрцах вашых сьпявалі вы Богу псальмы, гімны і песьні духоўныя.

17. І ўсё, што робіце словам ці дзеяньнем, усё (рабіце) ў імя Госпада Езуса, дзякуючы праз Яго Богу Айцу.

Прынцыпы сямейнага жыцьця

18. Жонкі, будзьце паслухмянымі мужам, як належыцца ў Госпадзе.

19. Мужы, любіце жонак вашых і ня будзьце для іх прыкрымі.

20. Дзеці, слухайце бацькоў у-ва ўсім, бо гэта падабаецца Госпаду.

21. Бацькі, не раздражняйце дзяцей вашых, каб яны не адчувалі крыўды.

22. Нявольнікі, слухайцеся ў-ва ўсім гаспадароў цялесных, не для вока служачы, каб людзям падабацца, але ў прастаце сэрца, баючыся Бога.

23. Усё, што ня робіце, ад душы рабіце, як Богу, а ня людзям,

24. ведаючы, што ў Госпада атрымаеце ў нагароду спадчыну, бо вы служыце Госпаду Хрысту.

25. Хто крыўдзіць, атрымае тое, на што заслужыў, бо (ў Бога) няма ўзіраньня на асобу.